Punts, 57, 2-1999, p. 13
_______________________________________________________________________________________________________________________________________________________________________________________
Fila gualiv, id es teis tur!
Il folk-rocker Paulin Nuotclà cun novas chanzuns
Da David Spinnler
Paulin Nuotclà ha edì ses emprim album dapi pli che 14 onns. In eveniment ch'è vegnì
celebrà cun in grond battaisem la fin da december a La Punt. Il disc cumpact
“Chanzuns e tocs rocks" preschenta musica a la Paulin, dentant era tuns pli dirs.
Insatge è cler: Paulin Nuotclà è anc adina in chantautur d'emprima qualitad. Perquai: Il
tip da musica per quest enviern da las PUNTS èn las chanzuns da Paulin Nuotclà.
"Po dar chi'd es resta tuot sco avant, mo eu vez ch'eu n'ha spettà bainquant ..." di Paulin
Nuotclà en la chanzun 'Teis tur'. Era nus avain spetgà ditg. Dapli che 14 onns ha Paulin
Nuotclà fatg pausa cun edir albums. Ussa ha el dentant danovamain vulì savair tge ch'i
munta da far in album. Spert èsi i: Senza maschadar enturn hani registrà la musica. Senza
grond brimbori tecnic. Autentic, bunamain live duevi esser.
Ma è lura propi tut restà sco avant cun la musica da Paulin? Paulin nun ha mai fixà ses stil.
EI di che la basa per quai ch'el fa saja adina stà folk-rock. Quai vala era per oz. Pli baud
vuleva el far insatge modern, in cuntrast envers la folclora tradiziunala. Oz na chanta el betg
be chanzuns, el suna en pli 'tocs rocks'. Paulin va era sin tribuna cun ina furmaziun classica
da rock. Pia tuns pli dirs che pli baud tranter chanzuns finas.
L'etichetta 'Dylan da l'Engiadina' quittescha Paulin cun in suspir. Quai è in clisché antic che
na plascha insumma betg. Sch'ins vul gia cumparegliar, alura cun Guccini u cun Bennato. E:
las chanzuns quietas èn las privilegiadas da Paulin Nuotclà.
Pertge è lura pir oz puspè 'il tur' da Paulin Nuotclà? EI ha adina fatg musica, ma el n'aveva
betg il temp per registrar. La band actuala sa cumpona da glieud che lavura e fa musica
dasper la professiun. Quai vul dir ch'igl è adina grev da chattar temp per sunar ensemen.
Ussa s'ha però accumulà bler material pront per edir. La gruppa vul cuntinuar, ins guarda co
i va vinavant. Gia ideas per in proxim project? "Alch acustic" di Paulin Nuotclà.
Fermas chanzuns
Per il mument pon ins giudair l'album actual “'Chanzuns e tocs rocks”. Ins senta dalunga ch'i
sa tracta da musica da Paulin Nuotclà, dal “vegl punk da La Punt” sco che Benedetto Vigne
al titulescha. Il stil è manifest. Ils tocs rocks sent'ins era bain: Tuns pli dirs da ghitarras
domineschan mintgatant. E lura èn qua quellas bellas balladas cun texts fins, chanzuns pli
quietas. Chanzuns sco “Roma”, “Jazzin” e “Sper la saiv” èn ovras dad in grond chantautur. E
quai è Paulin Nuotclà per propi: in chantautur. Tras tut il disc cumpact. Ils muments da
chantautur èn ils pli bels da l'ovra.
"Alch acustic" saja il proxim project, di Paulin. Bun uschia. Chanzuns da Paulin Nuotclà e ses
orgelet da bucca pudess’ins tadlar entiras notgs. Senza grond brimbori tecnic e senza grond
fracass è Paulin il pli bel. Vinavant uschia. “Fila gualiv” Paulin, igl è “teis tur”.
