Communicaziun a las medias
Il cussegl da la Scola auta da pedagogia dal Grischun (SAPGR) ha elegì ils 30 d’avust
2016 Dinesh Rajakaruna sco manader da Finanzas e servetschs.
Il nov manader da Finanzas e servetschs, Dinesh Rajakaruna ha studegià a la ZHAW
ed ha terminà cun success sia scolaziun cun il Bachelor of Science (BSC) en
informatica l’onn 2011. Sco manader da project IT en l’economia privata era el
incumbensà per clients da renum en las branschas furmaziun, medischina ed industria
dad autos cun il svilup da programs, quai tant sin champ naziunal sco er internaziunal.
L’onn 2015 ha el absolvì il Executive Master of Advanced Studies of Business
Administration (EMBA) a la Scola auta da tecnica ed economia (STE) a Cuira.
Rajakaruna lavura plinavant sco expert dal fatg per il proceder da qualificaziun dals
emprendists d’informatica en il chantun Grischun, sco era sco docent per Software
Engineering al IBZ a Sargans. Il nov manader da Finanzas e servetschs abita a
Cuira ed è creschì biling tudestg-talian. Cun l’elecziun da Rajakaruna ha il cussegl
da la scola auta da la SAPGR stgaffì premissas optimalas per dumagnar las sfidas
en il champ da tensiun tranter la furmaziun terziara da scolasts e tecnologias futuras.
Entrada en uffizi
Il commember nov elegì da la direcziun da la scola auta da la SAPGR cumenza sia
funcziun l’october 2016. Il cussegl, la direcziun, sco er ils collavuraturs da la Scola
auta da pedagogia dal Grischun gratuleschan a Rajakaruna per l’elecziun ed al
giavischan bler success en sia nova incumbensa.
Ulteriuras infurmaziuns:
Robert Ambühl, president dal cussegl da la SAPGR, tel. 079 261 55 50
Dr. Gian-Paolo Curcio, rectur da la SAPGR, tel. 081 354 03 02
