Fecund'arvure fiorida
Fecund'arvure fiorida
et misteriosa pianta,
preziosa Rughe santa,
arvure d'eterna vida.
Cust'est s'arvure fecunda
d'immensu infinitu amore
inue su Redentore
hat redimidu su mundu
salvende de su profundu
s'humanidade affliggida.
Arvur'alta zelestiale
fruttu de s'Onnipontente,
pianta viva risplendente
remediu de dogni male,
ch'ogni devotu mortale
tenet in coro imprimida.
Mistica arca de Noè
in cust'adde tempestosa,
vara illustre prodigiosa
de su perfettu Mosè,
scettru de s'eternu Re,
bandel'in altu stendida.
Giae chi sola abberzesit
sas duras portas de Chelu,
Rughe chi senza rezelu
s'humile mundu adoresit,
ue Giuanne intreghesit
sa mama sua affligida.
Cattedra d'alta lessione,
suprema istella divina,
solu refugiu et dottrina,
portu de salvassione,
mare de consolassione
in cudd'ultima partida.
Thronu ezzelsu singulare
de su sabiu Salamone,
signu de redenzione
chi det de Chelu falare,
signu chi si det mustrare
in sa valle addolorida.
Lughe vera naturale
d’isplendore sempiternu
ch'hat superadu s'infernu
cun cudda lugh'immortale,
chi non si dat uguale
ch'hat sa fide isclaressida.
Pianta chi cun lughe tanta
das lughe a su mundu totu,
custu pobulu devotu
infiamma 'e fide santa,
cunservala, digna pianta,
cun paghe eterna de vida.
Rughe santa, piedade
tene 'e custa cunfraria,
sempre li sias de ghia
pro sa tua bonidade,
pustis in s'eternidade
regnet cun tegus unida!
Cun particulare cura
protegi sos filigresos
et benzant totu cumpresos
cun sos santos de s’altura,
et regnent senza paura
in sa patria promittida!
Preziosa Rughe santa,
arvure d’eterna vida.
