A una giovanedda
A una giovanedda Cantu ses bella cara giovanedda cun frischesas e grazias de vida, mi pares una tanca fiorida piena de cuccui e sennoredda. Che una randa sa trizza niedda t’inghiriat sa tua fronte nida, e i sa cara sottile e colorida, tenet moddesas de frutta noedda. Chie ti det cullire o frutta santa pendente dae s’alvure ’e s’ingannu in sa tua serena primavera? Mai su entu sa tua pianta t’imbestat cun dolore e cun affannu e tenzas sempr’amabile s’aera.